Бэрэсидьиэн Владимир Путин Уһук Илиннээҕи уонна Арктикатааҕы ипотека бырагырааматын анал байыаннай дьайыы кыттыылаахтарыгар уонна СВО-ҕа сырдык тыыннара быстыбыт байыастар дьиэ кэргэттэригэр анаан анал льготалаах гына тарҕатары соруйда.
«Бу байыастарга улахан көмө буолар, дьиэлэнэр-уоттанар кыаҕы биэрэр», – диэн Ил Дархан Айсен Николаев эттэ.
Ону тэҥэ сорудаҕынан педагогтарга уонна медиктарга Арктикаҕа уонна Уһук Илиҥҥэ ирдэниллэр биэс сыллааҕы үлэ ыстааһа ирдэбилтэн ылылынна.
Өрөспүүбүлүкэҕэ Нерюнгригэ, Мирнэйгэ, Удачнайга, Алдан оройуонун Аллараа Кураанаҕар, Мииринэй оройуонун Айхалыгар уонна Хаҥалас оройуонун Мохсоҕоллооҕор ипотечнай кирэдьиит улаатан 60 кв миэтирэлээх дьиэҕэ тоҕус мөл солк тэҥнэстэ.
Санатарбыт курдук, Саха сирэ дьиэни киллэриигэ Уһук Илин регионнарын ортолоругар иккис миэстэҕэ турар. Ол курдук, Дьокуускайга 2023 сыл балаҕан ыйыгар хаарбах дьиэнэн ааҕыллыбыт тутуулартан 2030 сылга 40 тыһ тахса дьону саҥа дьиэҕэ көһөрүөхтээхтэр.
СӨ тутуу миниистирэ Виктор Романов иһитиннэрэринэн, Уһук Илиннэҕи икки быраһыаннаах кирэдьиити Саха сиригэр 8880-тан тахса дьиэ кэргэн туттубут.
«2023 сылга 47,3 млрд солк суумалаах 8882 кирэдьиит көрүлүннэ. Ону тэҥэ бырагырааманан дьиэни тутууга 19,1 млрд солк суумалаах 3449 кирэдьиит бэрилиннэ», – диэн Виктор Романов эттэ.
«Уһук Илиннээҕи ипотека» бырагыраама 2019 сылтан бэрэсидьиэн Владимир Путин көҕүлээһининэн олоххо киирдэ. Бэрэсидьиэн быһаарыытынан бырагырааманы 2030 сылга диэри уһаттылар.
