Өрөспүүбүлүкэ бырабыыталыстыбатын бэрэссэдээтэлэ Владимир Солодов Аллайыаха улууһун дьаһалтатын кытта оҕо искуустубатын оскуолатын материальнай-техническэй баазатын Култуура национальнай бырайыак чэрчитинэн сайыннарыы туһунан дьүүллэстэ. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.
Оскуолаҕа уопсайа 92 оҕо дьарыктанар. Оҕолору фортепианоҕа уонна гитараҕа оонньуурга, хуорунан ыллыырга, уруһуйдуурга уонна норуот уус-уран толорууларыгар уһуйаллар.
Дьаһалтаны кытта көрсүһүү кэмигэр Владимир Солодов дойду бэрэсидьиэнэ Владимир Путин Федеральнай Сүбэ мунньахха туһаайыытыгар дойду биир сүрүн хайысхатынан оҕо талаанын сайыннарар оҕо искуустубатын оскуолаларын сайыннарыы буоларын ыйбытын эттэ.
«Оҕо искуустубатын оскуолалаларын сайыннарыы туһунан дойду уларыйыыларыгар киирэр туһаайыыга этии, историяҕа киирэр олус суолталаах быһаарыы буолар. Оннооҕор Саха сирин уһук ыраах бөһүөлэктэригэр, Арктика оҕолоро кэрэҕэ уһуйуллар кыахтаналлара сүдү суолталаах. Биһиги сорукпут — кинилэр тоҕоостоох усулуобуйаҕа дьарыктаналларын ситиһии», — диэн Владимир Солодов бэлиэтээтэ.
«Култуура» национальнай бырайыак Россия бэрэсидьиэнэ Владимир Путин «Россия Федерациятын 2024 сылга диэри национальнай сыалларын уонна стратегическэй соруктарын туһунан» туһпайыытыгар олоҕуран 2019 сыл тохсунньу 1 күнүттэн ыытыллар.
2019 сылга бу национальнай бырайыак чэрчитинэн өрөспүүбүлүкэҕэ тоҕус оҕо искуустубатын оскуолалара үөрэнэр матырыйаалларынан уонна тээбириннэринэн хааччыллыбыттара. Ону тэҥэ Уус Алдан Сыырдаах уонна Горнай Дьикимдэ сэлиэнньэлэригэр икки култуура дьиэтэ тутуллубута.
