2025 сыл балаҕан ыйын 3-тэн 6 күнүгэр диэри Владивостокка Илиҥҥи экономическай форум буолуоҕа.
Тэрийээччилэр иһитиннэрэллэринэн, үбүлүөйдээх форум Уһук Илин уонна дойду бүттүүнүн экономиката сайдыытыгар олук буолуоҕа, норуоттар икки ардыларыгар бииргэ үлэлэһиини бөҕөргөтүөҕэ, доҕордуу дойдулары кытта сыһыаны күүһүрдүөҕэ.
РФ Бырабыыталыстыбатын Бэрэссэдээтэлин солбуйааччы – Уһук Илиҥҥи федеральнай уокурукка РФ Бэрэсидьиэнин боломуочуйалаах бэрэстэбиитэлэ Юрий Трутнев бэлиэтээбитинэн, форумҥа Уһук Илиҥҥи федеральнай уокурук уонна Азия-Тиихэй акыйаан регионун сайыннарыы тыын боппуруостарын көрүөхтэрэ: Уһук Илин дьонун-сэргэтин олоҕун хаачыстыбатын тупсарыы, итиэннэ Уһук Илин бэйэтэ инвестордар, идэтийбит исписэлиистэр, устудьуоннар уонна олоххо көхтөөх дьон талаһар сирэ буоларын ситиһии.
Санатан эттэххэ, 2015-2024 сылларга Илиҥҥи экономическай форумҥа уопсайа 29 трлн солкуобай суумалаах 2480 сөбүлэҥи түһэрсибиттэр. Сүрүн хайысхата — инфраструктурнай эбийиэктэри тутуу, энэргиэтикэни, хайа булар бырамыысаланнаһын, тырааныспар уонна таһаҕаһы тиксэрии ситимин сайыннарыы, ону тэҥэ Россия регионнарын социальнай-экономическай сайдыыта.
