Медицинскэй комплекснай кыһалҕалар Дьокуускайдааҕы научнай киин сыһыарыллыбыт ыарыһахтары өрөспүүбүлүкэтээҕи 3 №-дээх клиническай балыыһаҕа көрөр буолуоҕа. Бу туһунан СӨ доруобуйа харыстабылын пресс-сулууспата иһитиннэрэр.
«Бэлиэтээн эттэххэ, ЯНЦ КМП балыыһа дьиэлэрэ федеральнай бас билиилээх уонна ФИЦ ЯНЦ СО РАН оперативнай управлениетыгар сылдьар. Итиэннэ медицинскэй көмөнү тэрийиигэ, 3 №-дээх балыыһаны кытта дьиэни-уоту туһаныыга дуогабар түһэрсиллиэхтээх уонна медицинскэй үлэни толорууга лицензия ылыллыахтаах. Дьиэни-уоту биэрии үлэтэ быйыл бэс ыйыгар саҕаламмыта», — диэн иһитиннэриигэ этиллэр.
Дуогабар түһэрсиллибитин, лицензияны ылыы кэнниттэн өрөспүүбүлүкэтээҕи 3 №-дээх клиническай балыыһаҕа Кулаковскай уулуссатыгар турар 6 дьиэҕэ дьону көрөр буолуоҕа. Билигин 3 №-дээх РКБ-га сыһыарыллыбыт ыарыһахтары көрүү Киров уулуссатыгар 34 №-дээх дьиэҕэ ыытыллар.
«2022 сыл тохсунньу 1 күнүттэн нэһилиэнньэ медицинскэй көрүүтэ суох хаалыа суоҕа диэн чуолкайдыыбыт. Итиэннэ ФИЦ ЯНЦ СО РАН ахсынньы 31 күнүгэр диэри РКБ 3 №-дээх балыыһаҕа дьиэ иэнин биэрбэт түбэлтэтигэр, медицинскэй көмөнү бу тэрилтэ Дьокуускай, Киров уулуссаҕа 34 №-дээх дьиэтигэр көмөнү оҥоруо», — диэн министиэритибэ пресс-сулууспа иһитиннэрэр.
