«Якутия 24» ханаал сайта тас дойду олохтоохторугар анаан английскай тылынан эмиэ тахсар буолла.
«Саха сирин сонунунан хааччыйар сүрүн былаһааккаттан биирдэстэрэ, «Якутия 24» ханаал английскай тылынан тахсар сайта тас дойду олохтоохторугар туһаайыллар. Атын омук сонуну киэҥник тарҕатар хампаанньалара Россия саамай улахан регионун дьонун-сэргэтин, кэрэхсэбиллээх айылҕатын, архиологтар булумньуларын, айылҕа пааматынньыктарын, саха киинэтин туһунан уонна да атын элбэх араас иһитиннэриилэри куруутун таһаараллар. Бу сайт английскай тылынан саҥарар суруналыыстарга уонна ааҕааччыларга ананар», — диэн «Саха» национальнай көрдөрөр-иһитиннэрэр хампаанньа генеральнай дириэктэрэ Олег Марков кэпсээтэ.
Инникитин «Якутия 24» ханаалы өссө хас да атын омук тылынан таһаарар былаан баар. Бастатан туран, Азия дойдуларын диэки хайысхаланыаҕа.
«Биһиги Саха сирин туһунан суолталаах, сибиэһэй сонуннарынан хааччыйар, суукка устата саҥардыллар элбэх тыллаах сайт оҥорору былаанныыбыт», — диэн Олег Марков бэлиэтээтэ.
Билигин «Саха» национальнай көрдөрөр-иһитиннэрэр хампаанньа интернет ситимигэр үс тылынан үлэлиир: сахалыы – www.nvk-online.ru, нууччалыы – www.yk24.ru, английскайдыы – en.yk24.ru.
