«Якутия 24» ханаал редакцията оҕо көмүскэлин күнүн чэритинэн ыытыллар уруһуй куонкуруһугар өрөспүүбүлүкэ оҕолорун бастакы уруһуйдарын тутта.
«Якутия 24» ханаал оҕолор харахтарынан» куонкурус кытааччылара ханаал кэрэспэндиэннэрин, ыытааччыларын уонна атын үлэһиттэрин үлэтин хайдах көрөллөрүн ойуулууллар.
Куонкурус ыам ыйын 17 күнүгэр биллэриллибитэ. Акварель, гуашь, тушь, араас өҥнөөх эбэтэр боростуой харандааһынан, пастельынан эбэтэр цифровой уруһуйдар сканнарын ыам ыйын 30 күнүн 18.00 чааска диэри nvk-news@mail.ru электроннай аадырыска «Конкурс рисунков» тиэмэлээн ыытыахха сөп.
Хас биирдии уруһуй ааптар туһунан иһитиннэриилээх буолуохтаах: аата, араспаанньата, сааһа, үөрэнэр сирэ, олорор нэһилиэнньэлээх пууна, уруһуйдуурга туһаммыт матырыйааллара.
Дьүүллүүр сүбэ оҕо бэйэтэ толоруутун, үлэ уратытын, тиэмэни арыйыыны, уруһуйга айымньылаах сыһыаны, оҕо көрүүтүн уонна эдэр худуоһунньук маастарыстыбатын сыаналыаҕа.
Киирбит үлэлэр бары yk24.ru сайтка уонна «Якутия 24» ханаал социальнай ситимнэргэ аккауннарыгар тахсыахтара.
Кыайыылаахтары грамоталарынан уонна сыаналаах бириистэринэн наҕараадалааһын бэс ыйын 1 күнүгэр «Утро Якутии» биэрии эпииригэр ыытыллыаҕа.
