Россия ыксаллаах быһыыга-майгыга министиэристибэтин үлэһиттэрэ гражданскай оборона ыйынан өрөспүүбүлүкэ оскуолаларыгар куттала суох буолууга аһаҕас уруоктары ыыталлар. Бу туһунан Россия ЫБММ Саха сиринээҕи салаатын пресс-сулууспата иһитиннэрэр.
Оскуола оҕолоругар ыксаллаах быһыы-майгы балаһыанньатыгар тугу гыныахха наадатын, атыттарга хайдах көмөлөһүөххэ сөбүн кэпсииллэр. Ол курдук, баһаарынайдар бойобуой таҥаһы-сабы уонна баһаарга туттуллар сэби-сэбиргэли көрдөрөллөр, кэпсииллэр, хайдах туттулларын быһаараллар. Көмөнү оҥорууга практическай дьарыктары ыыталлар. Билиҥҥи туругунан, аһаҕас уруоктарга үс тыһыынчаттан тахса үөрэнээччи кыттыыны ылла.
Саха сиригэр гражданскай обороан ыйа алтынньы 1-тэн 29 күнүгэр диэри буолар. Сүрүн соруга — уопсастыбаҕа гражданскай оборона оруолун үрдэтии, нэһилиэнньэ болҕомтотун тардыы, ыксаллаах быһыыга-майгыга көмүскэллээх буолууну тэрийии, ону тэҥэ, үүнэр көлүөнэҕэ тус бэйэтигэр уонна уопсастыбаҕа куттала суох буолууга эппиэтинэһи иитии.
