Тааттаттан анал байыаннай дьайыыга ыҥырыллан, Ийэ дойдуну көмүскүүр охсуһууга дьоруойдуу охтубут Василий Репин үөрэммит Ытык Күөл 2 №-дээх орто оскуолатыгар «Дьоруой паартата» баар буолла. 5 оҕо аҕата, «Эр санаа» уордьанынан наҕараадаламмыт Василий Васильевич туһунан сырдык ахтылҕан, кининэн киэн туттуу, ону тэҥэ мунчаарыы барыта биир куҥҥэ силбэстэ.
Оскуола улахан саалата уу-чуумпу. Оҕолуун-улаханныын бу саҥа үйэҕэ, буола турар быһыы-майгы уот холоругар олоҕо быстыбыт киһи сырдык аатыгар кэлэн турарбытын өйдүүбүт. Киһи бэйэтин нэһиилэ кыана туттунар, элбэх саҥа дуораһыйбат тэрээһинэ. Бу күн Василий Репин ийэтигэр Изабелла Николаевнаҕа улуус баһылыгын солбуйааччы Святослав Сунхалыров төрөппүккэ ытыктабыл бэлиэтин туттарда уонна Ытык Күөл баһылыга Егор Павлов «Таатта нэһилиэгин бочуоттаах олохтооҕо» аат иҥэриллибитин туһунан иһитиннэрдэ.
Үс оҕолоох Репиннэр аҕалара эрдэ олохтон туораан, соҕотох уол Василий тоҕус сааһыттан ийэтигэр сүрүн көмөлөһөөччү буолан, оҕо сааһыттан уол оҕо, эр киһи – дурда-хахха, харыстыыр-харыһыйар күүс диэн санааны иҥэринэн улааппыта. 93 сыллаахха оскуоланы бүтэрэр, онтон икки сыл армияҕа сулууспалаан баран, оройуонааҕы милиция салаатыгар үлэтин саҕалыыр. 2011 сылтан тохтоон, тус дьарыктаах быһыытынан үлэлиир. Анал байыаннай дьайыыга Василий бэйэтин киэҥ көҕүстээх, сатабыллаах, барыны бары кыайыгас-хотугас, тулуур-дьулуур баар байыаһын быһыытынан көрдөрбүт. Дьоруой партатыгар олорор чиэһи 300 оҕоттон талан, 10 кылаас үөрэнээччитэ Егор Оросиҥҥа сүктэрдилэр.
Ийэтигэр соҕотох уол, ыал аҕа баһылыга, биэс оҕо аҕата Василий Репин туһунан сырдык санньыар өрүү сүрэххэ баар буоллун!
