Россия вице-премьерэ — Россия бэрэсидьиэнин Уһук Илиҥҥи Федеральнай Уокурукка боломуочуйалаах бэрэстэбиитэлэ Юрий Трутнев өрөспүүбүлүкэтээҕи Роспотребнадзор тэрилтэлэрин үлэһиттэригэр Пирогов аатынан уордьаны уонна Лука Крымскай мэтээлин туттарда. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
«Улахан суолталаах үлэҕит иһин махтанабын. Коронавирус ыарыыта Россияҕа да, сир үрдүгэр тарҕанна, ол кэмҥэ эһиги бэйэҕитигэр ыарахаттары барытын ылынаҕыт. Балаһыанньа тупсан эрэр. Саха сиригэр элбэх үлэ ыытыллар. Барыбытыгар бу үлэҕэ ситиһиини баҕарабын», — диэн кини бэлиэтээтэ.
Пирогов уордьанын эпидемиологическай кэтээн көрүү салаатын начальнига Валентина Григорьева уонна тырааныспарга кэтээн көрүү уонна санитарнай харыстабыл салаатын начальнига Юрий Степанов ыллылар.
Лука Крымскай мэтээлинэн тырааныспарга кэтээн көрүү уонна санитарнай харыстабыл салаатын сүрүн исписэлииһин Эльвира Земкинаны, эпидемиологическай кэтээн көрүү салаатын эксперин — сүрүн исписэлиис Оксана Игнатьеваны, тырааныспарга кэтээн көрүү уонна санитарнай харыстабыл салаатын 1-кы разрядтаах үрдүкү исписэлииһин Александр Тихоновы бэлиэтээтилэр.
Коронавирус ыарыыта тарҕаммыт бастакы күннэриттэн Роспотребнадзор исписэлиистэрэ Дьокуускайга, Нерюнгрига, Миирнэйгэ, Удачнайга, Ленскэйгэ уонна Усть-Нераҕа алта санитарнай поһу арыйдылар. 1 086 авиа рейси көрдүлэр, 50 тыһыынчаттан тахса көтөр пассажирдары бэрэбиэркэлээтилэр. Нерюнгри, Алдан уонна Аллараа Бэстээх тимир суолугар үс санитарнай поһу тэрийдилэр, 340 тимир көлөнү көрүстүлэр, 11 тыһыынча кэриҥэ пассажир температуратын мээрэйдээтилэр.
Маны таһынан, обсерватордары арыйдылар уонна айаннаан кэлбит, ыалдьыбыт дьону кэтээһини, тырааныспар дезинфекциятын уонна ааһар пууннары тэрийдилэр.
