Москваҕа Россия Байҕаллааҕы коллегиятын Арктикаҕа РФ национальнай интэриэстэрин көмүскүүр сэбиэтин бастакы мунньаҕа буолла.
Бу Сэбиэт Арктикатааҕы хайысхаҕа судаарыстыбаннай байҕал бэлиитикэтигэр аналлаах миэрэлэри ылынар сыалтан тэриллибитэ. Мунньаҕы дойду бэрэсидьиэнин көмөлөһөөччүтэ, Байҕаллааҕы коллегия бэрэссэдээтэлэ Николай Патрушев уонна Сэбиэт салайааччыта, РФ Бырабыыталыстыбатын Бэрэссэдээтэлин солбуйааччы – Уһук Илиҥҥи федеральнай уокурукка РФ Бэрэсидьиэнин боломуочуйалаах бэрэстэбиитэлэ Юрий Трутнев салайан ыыттылар.
Мунньахха Арктикаҕа национальнай куттала суох буолууну хааччыйар, норуоттар икки ардыларынааҕы сайдыыны, байыаннай-бэлитиическэй уонна социальнай-экономическэй балаһыанньаны кытта сибээстээх боппуруостары дьүүллэстилэр.
Саҥа верфэлэри тутууга, муустаах байҕалга ыарахан ыйааһыны таһар суудуналары тутар технологиялары сайыннарыыга этиилэри киллэрдилэр. Бэйэ бородууксуйаны оҥорорго, баар тиэхиньикэни уонна тэрили үлэҕэ сөптөөх гына тутарга-харайарга, суудуналары, верфэлэри тутууга, Арктикатааҕы инфраструктураны сайыннарыыга уо.д.а. болҕомтону уурдулар. Ону тэҥэ Арктиканы баһылыырга билим-технологическай кыаҕы эбии сайыннарар миэрэлэри көрдүлэр.
