РФ Бырабыыталыстыбатын бэрэссэдээтэлин солбуйааччы – РФ Бэрэсидьиэнин УИФУо-ҕа боломуочуйалаах бэрэстэбиитэлэ Юрий Трутнев Уһук Илиҥҥэ инвестиция бырайыактарын электрическэй энергиянан хааччыйыы боппуруоһугар мунньах ыытта.
Мунньахха РФ Уһук Илини уонна Арктиканы сайыннарыыга миниистирэ Алексей Чекунков, РФ Энергетикаҕа миниистирэ Сергей Цивилев, РФ Экэнэмиичэскэй сайдыыга министиэристибэтин бэрэстэбиитэллэрэ кытыннылар.
Уһук Илиҥҥэ электроэнергияны туһаныы үүнүүтэ 5 сыл иһигэр 21% тэҥнэһэр (Россия орто көрдөрүүтэ — 12%). Ол гынан баран, 2030 сылга диэри туһаныы сабаҕаланар үүнүүтэ 30% тэҥ (Россия орто көрдөрүүтэ — 15%). УИФУо-ҕа бырамыысыланнас уонна олорор дьиэ тутуутун үрдүк тэтимнэрэ, дойду орто көрдөрүүлэрин 30–80% куоһаран, электроэнергия тиийбэтин үөскэттилэр. Бу кыһалҕаны быһаарарга анаан Уһук Илин энергетикатын сайыннарар бырагыраама оҥоһуллубут. Бүгүҥҥү күҥҥэ «Схема и программа развития электроэнергетических систем России на 2026-2031 гг.» диэҥҥэ учуоттаммыт бырайыактар наадыйыылара 2030 сылга 2,6 ГВт тэҥнэһэр.
СиПР-га учуоттаммыт бырайыактартан ураты, регионнар этиилэринэн Россия Уһук Илини сайыннарыыга министиэристибэтэ өссө 105 бырайыагы, уопсай кыамталара 3,3 ГВт кэриҥэни, бигэргээбит. Бу бары бырайыактар биһиги дойдубут экэниэмикэтигэр наадалар, кинилэри наадалаах кыаҕынан хааччыйыы былаас уорганнарыгар инники күөҥҥэ турар соруктарынан буолар.
Быһаарыылары ылыллар миэрэлэр истэригэр билигин баар энергокыамталар көдьүүстэрин үрдэтии, бөдөҥ туһанааччылар бэйэлэрин генерациялыыр эбийиэктэрин туталларыгар тус экэнэмиичэскэй усулуобуйалары тэрийии этиллэр.
«Бүгүн Уһук Илин үбүлээһин бырайыактарын энергетикаҕа сүрүн наадыйыыларын хааччыйарга Россия Энергетикатын министиэристибэтин чугастааҕы 1,5-2 сылга анаммыт дьайыыларын чопчу былааннара наада. Балаһыанньа тэтимнээхтик уларыйар, онон бу түгэни бары учуоттуох тустаахпыт», — диэн Юрий Трутнев эттэ.
Мунньах түмүгүнэн вице-премьер РФ Энергетикаҕа министиэристибэтигэр, Уһук Илини сайыннарыыга министиэристибэтигэр уонна РФ Экэнэмиичэскэй сайдыыга министиэристибэтигэр хас да сорудаҕы биэрдэ: Уһук Илини гаастааһыны түргэтэтии туһунан РФ Бэрэсидьиэнигэр отчуот барылын РФ Бырабыыталыстыбатыгар киллэрэргэ; «КРДВ» АУо уонна «СО ЕЭС» АУо кытта Уһук Илин баар уонна кэскиллээх инвестиция бырайыактарын учуоттаан, энергетическэй кыамталары киллэрии былаанын-графигын оҥорон киллэрэргэ.
