Москваҕа ВДНХ-ҕа «Россия» быыстапка-форум чэрчитинэн «Знание» Россиятааҕы уопсастыба «Знание.Первые» федеральнай, үөрэҕи, билиини тарҕатар марафоҥҥа РФ бырабыыталыстыбатын вице-премьерэ — РФ бэрэсидьиэнигэр Уһук Илин федеральнай уокурук боломуочуйалаах бэрэстэбиитэлэ Юрий Трутнев кыттыыны ылла.
Сэтинньи 4 күнүгэр марафон бастакы күнүгэр «Знание.Родина» хайысхаҕа Юрий Трутнев Уһук Илин сайдыытын туһунан лекцияны аахта.
«Ханнык баҕарар сир-уот сайдыытыгар сүрүн күүһүнэн киһи буолар. Оттон ыччат туһунан этэр буоллахха, бу биһиги дойдубут саамай көхтөөх араҥата. Биһиги кэскилбит. Уһук Илиҥҥэ ыччат ахсаана элбээбитэ олус үчүгэй. 20-24 саастаахтар олохсуйа, үлэлии, үөрэнэ кэлэллэр. Бу аата Уһук Илин сырдык инникилээҕин көрдөрөр», – диэтэ Юрий Трутнев.
РФ бэрэсидьиэнэ Уһук Илини 21-с үйэҕэ дойду национальнай приоритета буоларын биллэрбитэ. Уон сыл иһигэр макрорегион сайдыытыгар 75 федеральнай сокуон уонна РФ бырабыыталыстыбатын 450 аактата ылылынна. Итилэр көмөлөрүнэн Уһук Илин сайдыытыгар ураты усулуобуйа тэриллэр.
