«Земскэй быраас» уонна «Земскэй биэлсэр» бырагырааманан уопсайа 74 исписэлиис тыа сиригэр үлэлиир.
Бу 54 быраас, 20 биэлсэр уонна акушерка. 2022 сыл бүтүөр диэри туруоруллубут былаанынан тыа сирин балыыһаларыгар 147 исписиэлиис үлэҕэ киириэхтээх.
«Исписэлиис быраастары тыа сиригэр, куорат тииптээх бөһүөлэктэргэ уонна кыра куораттарга ыҥырарга уонна олохсута хаалларарга «Земскэй быраас» уонна «Земскэй биэлсэр» бырагыраама көдьүүстээх», – Диэн Ил Дархан Айсен Николаев эттэ.
Ааспыт уон сылга 50 тыһыынчаҕа диэри нэһилиэнньэлээх тыа сиригэр, куорат тииптээх бөһүөлэктэргэ уонна кыра куораттарга 1 015 бырааһы ыыппыттар. Кинилэртэн 221 исписэлииһи Арктика оройуоннарыгар.
Кэлин биэлсэрдэр бырагыраамаҕа кыттар бырааптаммыттар. Бүтэһик сылларга 108 исписэлиис кыттыбыт, кинилэртэн 29-һа Арктикаҕа үлэлииллэр.
Тыа сиригэр үлэлии барбыт быраастарга биир кэмнээх төлөбүр көрүллэр: бырааска икки мөлүйүөн, биэлсэргэ биир мөлүйүөн солкуобай. Маны тэҥэ 50 тыһыынча нэһилиэнньэлээх куораттарга кэлбит быраастарга мөлүйүөннүү солкуобай төлөнөр, биэлсэрдэргэ — 500-түү тыһыынча солкуобай. Усулуобуйанан биэс сыл үлэлиирэ ирдэнэр.
