Бүгүн, ыам ыйын 15 күнүгэр, күнүс 14:50 чааска Жатайдааҕы суудунаны өрөмүөннүүр собуот сиригэр «Василий Гусев» теплоход тимирдэ. «ЛОРП» 1975 сыллаахха туппут суудуната консервацияҕа сыппыт.
Быһылаан тахсыбыт сиригэр СӨ Бырабыыталыстыбатын бөлөҕө тахса сырытта. Халаан уутун кэнниттэн буксиры таһааралларын былаанныыллар, билигин буоллаҕына биэрэккэ чугаһатан биэрдилэр.
«Буксирга үлэһиттэр суохтара, ону тэҥэ уматык, умайыан сөптөөх матырыйаал суоҕа бэлиэтэнэр. Суудунаны өндөтөн хостуур тэрээһиннэр былааннара оҥоһулунна. Халаан уута ааспытын кэнниттэн миэрэлэр ылыныахтара», — диэн СӨ суол-иис хаһаайыстыбатын уонна тырааныспар миниистирин эбээһинэһин толорооччу Анатолий Потапов иһитиннэрдэ.
Борокуратуура уонна Силиэстийэлиир кэмитиэт бэрэстэбиитэллэрин кытта хамыыһыйа үлэлиир. Росприроднадзор бэрэстэбиитэллэрэ кэлбиттэр. Кинилэр уу төһө киртийбитин чинчийэллэр.
Хаартыска: СӨ суһал штабын телеграм-ханаала
