Апелляция холуобунай эппиэтинэстэн дьокутааты босхолуурга төрүөттэри булбата.
Саха сирин Үрдүкү суутунан норуот дьокутаата Владимир Поскачин туһунан холуобунай дьыала апелляционнай бэрээдэгинэн көрүлүннэ. Урут кини Үөһээ Бүлүү оройуонун суутун быһаарыытынан саа боеприпастарын сокуону кэһэн харайбытын иһин буруйдааҕынан билиниллибитэ. Дьокутаат олорор сирин көрүү кэмигэр 7,62х54 калибрдаах бинтиэпкэ ботуруоннарын булбуттара уонна былдьаабыттара. Баллистическай экспертиза түмүгүнэн, ботуруоннар трассировкалыыр буулдьанан оҥоһуллубуттара уонна ытарга сөптөөхтөрө биллибитэ. Ол эрээри, «Об оружии» федеральнай сокуон 6 ыстатыйатынан, маннык ботуруон гражданскай эргиирэ Россияҕа бобуллар.
Үрдүкү Суут холуобунай дьыала матырыйаалларын бэрэбиэркэлээн, бастакы инстанция суутун буруйу оҥорбут киһи буруйдааҕын туһунан түмүктэрин кытта сөбүлэстэ. Онуоха, көмүскээһин өттүнэн этиллибит процессуальнай кэһиилэр тахсыбыттарын туһунан дакаастабыллар, эрдэттэн силиэстийэ кэмигэр даҕаны, дьыаланы суукка көрүү кэмигэр даҕаны, бигэргэтиини булбатылар. Ону таһынан Үрдүкү Суут көмүскээччи дакаастабылларын кытта сөбүлэспэтэ – дьокутааты холуобунай эппиэтинэстэн босхолуурга төрүөттэр баалларын, ону таһынан кини дьиҥнээхтик кэмсинэринэн холуобунай кэтэбили тохтотуу туһунан. Түмүгэр, буруйа дакаастаммытын, буруй квалификациятын уонна балтараа сыллаах көҥүлүн хааччахтааһын көрүҥүнэн анаммыт буруйдааһынын туһунан бириигибэр уларытыллыбата. Уларыйыылар суут быһаарыытын сорох өттүн эрэ таарыйдылар. Онон, өрөспүүбүлүкэ Үрдүкү Суута силиэстийэ кэмигэр былдьаммыт сааны, ботуруоннары уонна ытыллыбыт гильзалары Саха Өрөспүүбүлүкэтин Росгвардиятын Управлениетыгар туттарарга уурда.
Хаартыска: ЯСИА
