Дойду бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев экэнэмиичэскэй сайдыы министиэристибэтигэр, туризм бэдэрээлинэй ааҕыныстыбатыгар уонна Уһук Илин сайдыытын министиэристибэтигэр Уһук Илиҥҥэ уонна Арктикаҕа круизнай туризм сайдыытыгар сокуоҥҥа уларыйыылары киллэрэр үлэ былаанын оҥорор туһунан соруйда. Бу туһунан ТАСС иһитиннэрэр.
Региоҥҥа экспедиционнай суудуналары түһэрэр уонна ааһар сирдэрин сөпсөһүү механизма оҥоһуллара былааннанар.
Санатан эттэххэ, Россия бэрэсидьиэнэ Владимир Путин V Илиҥҥи экэнэмиичэскэй форумҥа дьон айылҕаҕа сылдьарын тоҕоостоох гына, туризм сайдыытын уонна айылҕа харамайын харыстааһынын олохтуурга стратегическай сорук туруорбута. Онно Уһук Илин бүттүүн экспериментальнай былааһакка буолара быһаарыллыбыта.
